இணையக்கால கவியரங்கம் 29 16/11/2023
டிஜிடல் மயம் ஜகது
நடுத்தர வயதிருக்கும்
கிராமத்துப்பெண்
மூன்று சக்கர வண்டி ஓட்டுகிறாள்
காய்கறிகள் வண்டி நிறையக்
கொட்டிக்கிடக்கிறது
இன்ன இன்ன காய்கள்
இன்ன இன்ன விலை சொல்லி
டேப்ரெகார்டெர்’ வாங்க அம்மா வாங்க’
அம்சமாய்ப்பேசுகிறது
வண்டியை நிறுத்தி நிறுத்தி
வியாபாரம் நடக்கிறது
டிஜிடல் தராசில்
எடை போடுகிறாள்
வேலையை அசமடக்கி
திரும்பவும் வண்டியை எடுக்கிறாள்.
தொண்டை வறளத் தெருவில்
கத்தி கத்தி விற்கும் காலம்
மலையேறிப்போச்சு.
‘சில்லரை குடுங்க’
‘என்னா இது நோட்டு கந்தலா இருக்கு’
பத்து ரூவா துட்டு நா வாங்குறதே இல்ல’
எந்த கூப்பாடும் இல்லை
க்யூ ஆர் கோடு வைத்து
ஜம்ஜம்மென்று நடக்கிறது
வியாபாரம்
டிஜிடல் உலகு யாரை
விட்டு வைத்திருக்கிறது
மின்சார ரயில் பிச்சைக்காரியிடம்
டேப்ரெகார்டர் உண்டு
நல்ல செறுப்பும் ஹாண்ட் பேக்கும்
உண்டு அவர்களிடம்
க்யூ ஆர் கோடு மட்டுமே பாக்கி.
No comments:
Post a Comment