Friday, July 1, 2022

 குன்றக்குடியை உள்வாங்குவோம்.            

 

தவத்திரு  குன்றக்குடி அடிகளார் நூல்திரட்டு என்ற தலைப்பில் ஒரு கட்டுரை நூலை சாகித்ய அகாதெமி வெளியிட்டுள்ளது. தொகுப்பாசிரியர் மரு.பரமகுரு.

தவத்திரு குன்றக்குடி அடிகளார்(1925-1995) குன்றக்குடியிலுள்ள திருவண்ணாமலை ஆதீனத்தின் 45 வது குரு மகா சந்நிதானம் ஆவார்.

 அடிகளார் பல்வேறு விருதுகளையும் பாராட்டுக்களையும் பெற்றவர். சங்க காலம் தொடங்கிச் சமகாலம் வரைக்குமான தமிழ் இலக்கியங்கள் தத்துவங்கள் ஆகியவற்றைச்சமுதாய நோக்கோடு ஆய்வு செய்தவர். அடிகளார் எழுதிய தேர்ந்த  கட்டுரைகள்  சில அடங்கிய தொகுப்பே  இப்புத்தகம்.

சங்க காலத் தமிழர் வாழ்வியல் தொடங்கி சைவ சித்தாந்தமும் மார்க்சியமும் என்கிறவரைக்குமான  17 கட்டுரை மலர்களை இவண் நுகர வாய்க்கிறது. குன்றக்குடி அடிகளார் வாழ்க்கைக் குறிப்பு என்னும்  பகுதியிலிருந்து சில செய்திகளை நாம்  வாசிக்கிறோம். மனம் நிறைவெய்துகிறது.

குன்றக்குடி அடிகளார் 11 ஜூலை 1925ல் நடுத்திட்டு கிராமத்தில் தஞ்சைப்பகுதியில் பிறந்தவர்.இயற்பெயர் அரங்கநாதன்  அடி நாட்களில் சிதம்பரம் அண்ணாமலை நகரில் வாழ்ந்திருக்கிறார். ரா.பி சேதுப்பிள்ளை, சுவாமி விபுலாநந்தர் ஆகிய தமிழ் அறிஞர்களோடு தொடர்புகொண்டவர். இந்திய விடுதலைப்போராட்டத்தில் நாட்டம் மிக்கவர்.  பூதான இயக்கப்பெருந்தலைவர் வினோபாபாவே பெயரில் படிப்பகம் நடத்தியிருக்கிறார்.

தருமை ஆதீன 25 ஆவதுசந்நிதானம் தீட்சை தர  அரங்கநாதன், கந்தசாமித்தம்பிரான் ஆகிறார் பின்னர் தருமபுரம் தமிழ்க்கல்லூரியில் பயில்கிறார். 1949 ல் குன்றக்குடி திருவண்ணாமலை ஆதீன இளைய பட்டம் ஏற்கிறார்.  ஸ்ரீலஸ்ரீ தெய்வசிகாமணி அருணாசல தேசிக பரமாச்சாரிய சுவாமிகள் என்கிற பட்டம் ஏற்கிறார். . 1952 ல் தமிழ்நாடு நாளிதழ் அய்யாவுக்குத் தவத்திரு குன்றக்குடி அடிகளார்  என்கிற பெயர் சாற்றி அப்பட்டப்பெயரைத்தொடங்கிவைக்கிறது.

1954ல் இராஜாஜி தலைமையில்  அடிகளார் அருள்நெறித் திருக்கூட்ட மாநாடு நடத்துகிறார்.1956 ல் அறிஞர் அண்ணா குன்றக்குடி மடத்துக்கு வருகை தருகிறார்.  அடிகளார் பின்னர்   நாத்திக இயக்கத்தலைவர் ஈ.வெ .ரா பெரியாரைச்சந்திக்கிறார். சர்வோதயத்தலைவர் வினோபாபாவே திருமடம் வந்து  அடிகளாரைக்காண்கிறார்.1958 ல் பாரதப்பிரதமர் நேரு குன்றக்குடி மடத்திற்கு விஜயம் செய்கிறார்.

 அடிகளார் 1961ல் மதுரை மீனாட்சி அம்மன் கோவிலில் தமிழ் அருச்சனை தொடங்கும் நிகழ்வில் பங்குகொள்கிறார். 1966ல் தமிழ் நாடு தெய்வீகப்பேரவை தோற்றம் பெருகிறது.

1969ல்  அன்றைய முதல்வர் மாண்புமிகு மு. கருணாநிதி  அவர்கள் விருப்பத்தின்படி அடிகளார் சட்டமேலவை உறுப்பினரானார். 1970 சாதி வேறுபாடின்றி அனைவரையும் அருச்சகர் ஆக்கவேண்டும் எனப்  புரட்சி உரைநிகழ்த்துகிறார்.

இராமநாதபுரம், மண்டைக்காடு புளியங்குடி ஆகிய இடங்களில் நிகழ்வுற்ற இனக்கலவரங்களுக்கு எதிராக  அடிகளார் அமைதிப்பணி ஆற்றியவர். தமிழகரசு நிறுவிய திருவள்ளுவர் விருதினைமுதன் முதலில் பெற்றவர். குன்றக்குடியில் அடிகளார் செய்திட்ட சமூக சேவை இந்திய அளவில் புகழ் பெற்று அது Kunrakkudi Pattern என்று அறிவிக்கப்பட்டது.

1989ல் அண்ணாமலைப்பல்கலைக்கழகம் அடிகளாருக்கு கெளரவ டாக்டர் பட்டம் வழங்கிப்பெருமை சேர்த்தது.1993ல் மதுரைக்காமராசர் பல்கலைக்கழகம் தமிழ் பேரவைச்செம்மல் என்கிற விருதினை வழங்கியது.

1995ல் அடிகளார் இறைநிலை எய்தினார்.

இக்கட்டுரைத்தொகுப்பில்

’சங்கத்தமிழர் வாழ்வியல்’ என்னும் முதல் கட்டுரை தமிழர்தம் தொன்மைச்சிறப்பு பேசுகிறது .தமிழ் மாந்தர் தம் அறம் பண்டு உச்சிமேல் வைத்து மெச்சத்தக்கதாய் இருந்தமையை எடுத்துவைக்கிறது.

புறம் 18  ’  நீரின்றி அமையா யாக்கைக்கு எல்லாம்

                   உண்டி கொடுத்தோர் உயிர் கொடுத்தோரே

                   உண்டி முதற்றே உணவின் பிண்டம்

                  உணவெனப்படுவது நிலத்தொடு நீரே.’

என்று பேசும் குடபுலவியனார் கவிதை ஈராயிரம் ஆண்டுகட்கு முன்னரே தமிழர் நீர் ஆளுகையின் இன்றியமையாமையை அறிந்திருந்தனர் என்பதை அறிவிக்கிறது.

நாடென்ன காடென்ன மேடென்ன பள்ளமென்ன இவை கிடக்கடும் ஆடவர் நல்வழி செல்லுதல்மட்டுமே ஒரு நாட்டின் மாண்பினைப்பேணுகிறது என்கிறது சங்கப்பாட்டு.

தலைமுடி  ஒன்றுகூட நரைத்தலே இல்லாது ஒரு முதியவர் காட்சிதருகிறார். காரணம் யாது என வினவ, விடை வருகிறது.

’யாண்டு பலவாக நரையில ஆகுதல்

யாங்காகியர் என வினவுதிராயின்

மாண்டஎன் மனைவியொடு மக்களும் நிரம்பினர்

யான்கண்டனையர் என் இளையரும் வேந்தனும்

அல்லவை செய்யான் காக்கும்.அதன்தலை

ஆன்றவிந்தடங்கிய கொள்கைச்

சான்றோர் பலர் யான் வாழுமூரே’

புலவர் பிசிராந்தயர் பெருமையோடு குறிப்பிடும் இச்செய்திகள்நம்மை என்றும் வியக்கவைக்கின்றன.

கணியன் பூங்குறனாரின் தமிழர் பெருமை பேசும்பாடல் தொட்டு அடிகளார்பேசுகிறார்  யாதும் ஊரே யாவரும் கேளிர் தீதும் நன்றும் பிறர் தர வாரா என்று தொடங்கும் அந்தப்பாடல் என்றும் நம் சிந்தனையைக்கிறங்கவைக்கும்பாடலாகும். இறப்பு என்ன நமக்கு புதியதா வாழ்வது இன்பம் கொணர் மகிழ்ச்சி ஊற்றா என்று சொல்லிக்கொண்டே போகிறார். இறுதியாய்

மாட்சியின் பெரியோரை வியத்தலும் இலமே

சிறியோரை இகழ்தல் அதனினும் இலமே! என்று முடிக்கிறார்.

திறவோர் காட்சியில் நாங்கள்  அறிவில் தெளிந்தனம் ஆகவே பெரியோரை வியத்தலும் சிறியோரை இகழ்தலும் செய்யோம். சிறியோரை இகழ்தல் அதனிலும் இலமே என்கிறாரே புலவர். இந்தப்பண்பாட்டின் உச்சத்தை எட்டிய தமிழ் மக்களின்று எப்படி எப்படி எல்லாம்  நடந்துகொள்கிறார்கள் என்பது அனுபவம் ஆகும் போது  அடிகளாருக்கு நெஞ்சம் நோகிறது.

‘செல்வத்துப்ப்யனே ஈதல்

துய்ப்பேம் எனினே தப்புந பலவே  (புறம் 189)

ஈராயிரம் ஆண்டுகளுக்கு முன்னரே இங்கே  தமிழ் மண்ணில் பொதுவுடமை துளிர்விட்டிருக்கிறது. இச்செய்தியை உலகத்திற்கு ஓங்கிச்சொல்லவேண்டியது தமிழ்மொழியை  ஆழ்ந்து படித்த  ஒவ்வொரு மனிதனுடைய கடமையேயாகும்.

பரிபாடல் 5.78-81 இப்படிப்பேசுகிறது.

..யாம் இரப்பவை

பொருளும் பொன்னும்போகமும் அல்ல நின்பால்

அருளும் அன்பும் அறனும் மூன்றும்

உருள் இணர்க்கடம்பின் ஒலிதாரோயே

 உலகம்மாயை என்று கூறிய ஆதிசங்கரர் கனகதாரா தோத்திரம் இயற்றி பொன்மழை பெய்ய அவாவுகிறார். ஆனால் பரிபாடல் தந்த தமிழ்க்கவியோ இறைவனிடம்  பொருளும்பொன்னும்   போகமும் எனக்கு  வேண்டாம் அருள் வேண்டும் அன்பு வேண்டும் அறன் வேண்டும் என்கிறார். எத்தனைப்பெரிய வேறுபாடு.

அடுத்துவரும் கட்டுரை ‘வாழ்விக்க வந்த வள்ளுவம்’. அது அறிவு நெறி, ஆள்வினை  பொருள், அன்பு நெறி,ஒழுக்க நெறி, ஒருமை நெறி, அருள் நெறி, என்று பல்வேறு தளங்களில் அடிகளாரால் இவண் திருக்குறள் ஆராயப்படுகிறது.

அன்பின் வழியது உயிர்நிலை அஃதிலார்க்கு

என்புதோல் போர்த்த உடம்பு( குறள் 80)

இவ்வுலகில் உயிர் நிலைத்து நிற்பதற்கு அன்பு மட்டுமே ஆதாரம் என்கிறார் வள்ளுவர்.

திருக்குறள் போன்ற ஒரு முழுதுறழ் அறநூலைத் தர தகுதியடையதாக வாழ்ந்த இனம் தமிழினம் என்று சிறப்பாகப்பேசுகிறார் அடிகளார்.

மூன்றாவது கட்டுரை சிலம்பு நெறி.  அடிகளார் இக்கட்டுரையில் தீண்டாமை குறித்துப்பேசுகிறார்.அதன் கொடுமைகள் என்றேனும் முடிவுறுமா என்று ஏங்குகிறார்.மனித இனம் இன்னும் தன்னைத்திருத்திக்கொள்ளாதது ஏனோ என்று கேள்வி வைக்கிறார்.

‘தீண்டாமை குற்றம்.தீண்டாதார் என்று ஒதுக்குதல் கூடாது.சாதிவேற்றுமைகளை அறவே விலக்கவேண்டும்.எல்லாரும் ஓர்குலம் என்ற கருத்து சங்க காலத்திலிருந்து இலக்கியங்களில் ஒரேமாதிரியாக உரத்த குரலில் அறிவுறுத்தப்பட்டு வருகிறது.யாராவது கேட்டார்களா? பின்பற்றினார்களா? படித்ததில் என்ன குறைவா?உரைகள் எழுதி அச்சிடவில்லையா?பட்டிமன்றங்களில் பேசி மகிழவில்லையா? ஆனால் நடைமுறை என்பது என்ன?’யாதும் ஊரே யாவரும் கேளிர்’ என்பது என்னவாயிற்று? தெருச்சண்டைகள்தானே வளர்ந்தன.’

இப்படி அடுக்கிக்கொண்டே போகிறார் அடிகளார்.

நான்காவடாக வரும் கட்டுரை ’திருமுறைகளின் மாண்பு’   இவண் அப்பர் பெருமான் குறித்துச்செழுமையான விவாதம் வைக்கிறார்.

தமிழ்ச்சமூகத்தின் மொழிவழி நாகரிகத்தையும் அவர் பேணிக்காக்கப்பெருந்தொண்டாற்றியமை மறக்க முடியாதது.சமணத்தின் நுழைவினால் சைவமும் தமிழும் குன்றிக்குற்றுயிராகிக்காலப்போக்கில் மறைந்தொழிய ஏதுவாகுமெனக்கருதியே சமணர்களால் உண்டான இன்னல்களை எல்லாம் எதிர்த்துப்போராடினார்.இசையைத் துய்க்கத்தெரியாத அனுபவிக்கத்தெரியாத அன்றையச்சமணர்கள்’மலரை மணக்காதே’ என்பதுபோல்’இசையைப்பொழியாதே’ என்பதுபோல் ‘இசையைச்சுவைக்காதே’ எனத்தடைபோட்டார்கள். தடைவரினும் படைவரினும் தளராது தன்னம்பிக்கையால் உளவலிமையால் இன்னிசை பொழிந்து இசைத்தமிழ் வளர்த்தார் அப்பரடிகள்: என்று அரிய செய்தியை எடுத்து வைக்கிறார். இதுகாறும் இசைகுறித்துச்சமணம் என்ன விளக்கம் தருகிறது என்று  ஆய்வாளர்கள்யாரும் எடுத்து இயம்பியதாகத்தெரியவில்லை. இனி இது குறித்து செழுமையான விவாதம் எழுப்பப்படவேண்டும்.

சமணம் இப்படி  என்றால் பெளத்தம் மதம் இசை குறித்து என்ன நிலைப்பாடு கொண்டுள்ளது என்பதுவும் விவாதப்பொருள் ஆகி  கருத்தாக்கங்கள்  பெறப்படவேண்டும்.

தமிழர் திரள் மூன்று பெரியோர்களுக்கு என்றும் கடன் பட்டவர்கள். அவர்களன்றித் தமிழ் இல்லை. அவர்கள் திருவள்ளுவர்,திருமூலர்,மாணிக்கவாசகர் ஆகியோர்.  திருக்குறளும் திருமூலமும் திருவாசகமும் நமது  சிந்தனைச்செல்வங்கள்.மனிதகுல விழுமியங்கள் அவை.

திருவாசகத்தேன் என்பது அடுத்தக் கட்டுரை. அடிகளார் சராசரி மனிதனைக்குறித்துப் பேசுகிறார். மனிதன் விரும்புவது புகழ்.ஆசைப்படுவது புகழ்,ஆனால் புகழ் விருப்பம்கூடமனிதனைக்கெடுத்து வீழ்த்தி விடும் என்பதே அறநெறிதருமுடிவு என்கிறார்.

மாணிக்கவாசகர் உயிருண்ணிப்பத்து என்னும் பகுதியில் இறைவனிடம் இப்படியாய் விண்ணப்பம் வைக்கிறார்.

வேண்டேன் புகழ் வேண்டேன் செல்வம்

வேண்டேன் மண்ணும் விண்ணும்

வேண்டேன் பிறப்பிறப்புச்சிவம்

வேண்டார் தமை நாளும்

தீண்டேன் சென்று சேர்ந்தேன் மன்னு

திருப்பெருந்துறை இறைதாள்

பூண்டேன் புறம் போகேன் இனிப்

புறம்போகல் ஒட்டேனே.

அடுத்துவரும் இராமனும் சீதையும் என்னும் கட்டுரையில் கம்பனின் கருத்துப்படி இராமன் ஒரு சிறந்த தலைமகன் தெய்வத்தன்மை உடையவன். ஆனால் வால்மீகியின் கருத்துப்படி இராமன் ஒரு சாதாரண மனிதனே. வால்மீகி இராமனைத்தெய்வத்தன்மையுடையவனாக யாண்டும் குறிப்பிடவில்லை என்று எடுத்துவைக்கிறார் அடிகளார். தந்தைபெரியாரின் இராமாயணக்கருத்துக்கள் குறித்து

நல்லதொரு மறுப்பு விவாதமும் செய்கிறார் அடிகளார்.

பெரியார் வலிந்து மரபு மீறி பாத்திரங்களைக்களங்கப்படுத்துகிறாரே என்று ஒரு விமரிசனத்தையும் அடிகளார் வைக்கத் தவறவில்லை.

ஏழாவது கட்டுரையாக மலர்ந்திருப்பது’ குமரகுருபரரின் உயிர்க் கொள்கை’. உயிர்கள் என்றும் உள்ளவை. உயிர்கள் வளர்வதற்கு உணர்வு தேவை.உணர்வுக்குத்துணையாயிருந்து தூண்டிச்செய்வது ஆற்றுப்படுத்துவது கடவுள். இந்தச்செய்தியை குமரகுருபரரின் உயிர்க்கொள்கையாக அடிகளார் வாசகனுக்குத்தெரியவைக்கிறார்.

அடுத்துவரும் கட்டுரை தாயுமான சுவாமிகள் .  மனித உயிர் ‘அறியாமைச்சாரின் அதுவாய் அறியும்,  நெறியான போது அதுவாய் நிற்கும்’ என்கிறார் தாயுமானவர். ஆணவம் உயிரின் கண்ணை மறைத்துவிடும்.  அந்த ஆணவமே அறியாமை, உயிர் சிவ நெறி பட்டபோது ஆணவம் தானே மறைந்துபோகும்.

‘ஆரியம் கதவைச்சாத்தும்,தமிழ் கதவைத்திறக்கும்’ என்கிற ஒரு பிரத்யேக மொழிப்புரிதலை அடிகளார்  நமக்கு வழங்குகிறார்.

தொடர்ந்துவரும் வள்ளலார் நெறியில்  சமூக சிந்தனையைச்சொல்லிச்செல்கிறார் . ’நம் நாட்டிலே அர்ச்சகர் வீட்டிலே அர்ச்சகன் பிறந்துவிடுகிறான்.அவனுக்கு ஞானம் வேண்டாம் ஒழுக்கம் வேண்டாம்,ஆனால் தாசில்தார் வீட்டிலோ தாசில்தார்பிறப்பதில்லை.தண்டல் நாயகம் வீட்டில் தண்டல் நாயகம் பிறப்பதில்லை’ தண்டல் நாயகம் எனில் அது மாவட்ட ஆட்சியர் என்பதறிவோம்.

வள்ளற்பெருமான் கண்ட பொதுமை நெறி வையகத்தில் மலரவேண்டும் என அவாவுகிறார் அடிகளார். வள்ளற்பெருமான் கண்ட பொதுமை நெறி கடவுள் நம்பிக்கையில் தோன்றிய பொதுமை நெறி என்று பேசுகிறார். எள்துணையும் பேதமுறாது எவ்வுயிரும் தம் உயிர் போல் எண்ணி உள்ளத்தில் பூரணமாய் ஒத்து அவ்வுயிர்  முழு உரிமை உடையதாய் உவக்கின்ற மனம் வேண்டுகிறார் வள்ளலார்.

10,11,12 ஆகிய மூன்று கட்டுரைளுமே பாரதி பற்றியன. பெண் விடுதலைக்குக்குரல் தந்த பாரதியைப் புகழும் அடிகளார்’ எந்தக்காரணத்தைமுன்னிட்டும் பெண்ணை ஒரு விளம்பரப்பொருளாகப் பயன்படுத்துகிற கவர்ச்சிப்பொருளாகப் பயன்படுத்துகிற அனைத்தும் தடை செய்யப்பட்டால் ஒழிய இந்த நாட்டினுடைய பெண்களுக்குத் தரமான தகுதி வராது.’ என்கிற எச்சரிக்கையை நமக்கு விடுகிறார்.

ரஷ்யப்புரட்சியை ‘ஆகா என்று எழுந்ததுபார் யுகப்புரட்சி’ என்று  வரவேற்ற முதல் இந்தியக்கவிஞன் பாரதியைப் புகழ்கிறார் அடிகளார்.

வாணவேடிக்கைகள் அழகொழுகும் பேச்சுக்கள்,பகட்டான பேரணி,அணி அணியாக ஊர்ந்துவரும் கார்கள் இவைகள் மக்களாகிய மன்னர்களின் அதிகாரத்தைக்கெடுக்கும் முதலாளித்துவத்தின்  நச்சுப்பூச்சிகள் என்கிறார் அடிகளார். நாம் என்றுதான் விழித்துக்கொள்வது என்று வினா வைக்கிறார்.

அடுத்துவருவது குடும்பவிளக்கும் குறளும் என்னும் கட்டுரை. பாரதிதாசனின் குடும்ப விளக்கு  தமிழில் ஒரு சாகா இலக்கியம் என்று பேசுகிறார் அடிகளார். அடுத்துவரும் பட்டுக்கோட்டையின் பாடல்கள் என்னும் கட்டுரை  பொதுமைக்கவிஞர் கல்யாணசுந்தரம்   கவிதைபற்றி ச்சிறப்பாகப்பேசுகிறது.

‘எல்லோருக்கும் நம்பும்படி சொல்லும் திறனிருந்தால்

சொல்லிலே உண்மையில்லை

உள்ளதை உள்ளபடி சொல்லும் மனிதனிடம்

உணர்த்திடும் திறமையில்லை

உண்மையும் நம்பவைக்கும் திறனும் அமைந்தவனை

உலகம் ஏற்பதில்லை.’

பட்டுக்கோட்டையின் இக்கவிதை வரிகளை ச்செம்மையுறக்காட்டி அடிகளார் அக்கவிஞரை நமக்கு அறிமுகப்படுத்துகிறார்.

அடுத்து வரும் இரு பெரும் கட்டுரைகள் ஒன்று நமது நிலையில் சமயம் சமுதாயம், இரண்டு சைவ சித்தாந்தமும் மார்க்சியமும் என்பன.

சேக்கிழார் நந்தனார் வரலாற்றில் நந்தனாரைச்சிந்தை குளிரச்செவி குளிர ‘ஐயர்’ என்று பலதடவை போற்றுவது எண்ணத்தக்கது என்கிறார் அடிகளார்.

’தீண்டாமையை நமது சமயத்திலிருந்து அறவே அகற்றிக்கோடானுகோடி மக்களின் வாழ்க்கையில் ஒளியேற்றத்தவறிவிடுவோமானால் நமது கடமையை நாம் செய்யத்தவறியவர்கள் ஆவோம்’ அடிகளாரின் அறிவுரை நம் மனம் தொட்டுப்பேசுகிறது. தொடர்கின்றன வினாக்கள்.

தமிழ் நிலத்தில், பழுத்த அனுபவத்தில் தோன்றிய இறைவழிபாடு, இன்று முதிராப்பிள்ளைகளின் சிறு விளையாட்டுப் போல் அமைந்துவிட்ட கொடுமையை நினைந்து உட்கி வெட்கமுறாதார் நெஞ்சம் என்ன நெஞ்சம்?’ அடிகளாரின் இக்கேள்வி சிந்திப்பாளர்களை உறங்கவும் விடுமா என்ன?

புழுதியில் கிடக்கும் மனிதர்களைப்பற்றிச்சிந்திக்காத இத்திருமடங்கள் என்னதான் செய்யவிருக்கின்றன?

மக்களைத்தழுவி வளர்க்காத சமய நிறுவனங்கள் எதற்காக?

நடமாடும் கோயில்களை நாடிப் போற்றாத நிறுவனங்கள் எதற்காக?

‘பதவுரையும் பொழிப்புரையும் எழுதினார்கள் இலக்கணக்குறிப்புகள் எழுதினார்கள் தெளிவாகச்சொன்னால் இலக்கியச்சிந்தனை என்ற பெயரால் திருவள்ளுவர் ஏற்றி வைத்த புரட்சி விளக்கை அணைத்தே விட்டார்கள். இன்னும் திருக்குறள் தந்த திருவள்ளுவர் வழிபாட்டுக்குத்தான் பயன்படுகிறார்.கவியரங்கம் பட்டிமன்றங்களுக்குத்தான் பயன்படுகிறார்.  படிக்கப்படிக்க வாசக  மனம் வலிக்கிறது.

விருத்தாச்சலம் நகரில் பழமலநாதர்  கீழைக் கோபுரம் முன்பாய் முற்போக்கு எழுத்தாளர் சங்க மேடையில் அடிகளார்,’ இந்த தமிழ் சமூகத்தைச்சற்றாவது  உயர்த்திவிட யான்  அவாகொண்டேன் முடியவில்லை. என்னை வளர்த்து ஆளாக்கிய இச்சமூகத்தை ஒரு அங்குலம்  கூடப் பண்பாட்டில் உயர்த்தாமல் என் வாழ்க்கை முடியப்போகிறதே என் செய்வேன்?’ இப்படிக் கண்ணீர் மல்கி அழுத பெரு உள்ளம் அல்லவா அது. பிறகு மேடைஎதுவும் ஏறினாரில்லை. சிந்திப்பதை அவர் நிறுத்திக்கொண்டார்.

----------------------------------------------------------------------------------------------

 

இராஜகோபாலாச்சாரி

 சக்ரவர்த்தி இராஜகோபாலாச்சாரி’   -ஆர்.கே. மூர்த்தி            -

 

நவபாரத சிற்பிகள் வரிசையில் இராஜாஜி பற்றி இந்திய அரசின் பப்ளிகேஷன்ஸ் டிவிஷன் -தகவல் ஒலி பரப்பு அமைச்சகம் - வெளியிட்ட நூல்.

முதல் பதிப்பு 2006  ரூ 145 பக்கங்கள் 284

 

மூதறிஞர் இராஜாஜி என்போம். ஆயின் அவர் வர்ணாசிரம தர்மத்தை தூக்கிப்பிடித்தார். ஏர் பிடிப்பவன் மகனும் ஏர் மட்டுமே பிடிக்கவேண்டும் என்றும் உத்தரவிட்டவர் என்றும் சொல்வோம்.  ஒரு ஆளுமை பற்றி மெய்யான அறிதலுக்கு மட்டும் முயற்சி எடுத்துக்கொள்ளத் தயங்குகிறோம்.

இந்த நூல் இராஜாஜி பற்றி நாம் அவசியம் அறிந்துகொள்ளவேண்டிய தகவல்களை நமக்குத்தருகிறது. நம் தேசத்து முதல் பாரத ரத்னா விருது அவருக்கு வழங்கப்பட்டிருக்கிறது. வரலாற்று விஷயங்களில் அக்கறை செலுத்துவோர் அவசியம் வாசிக்க வேண்டிய இந்த அரிய நூலை  ஆர். கே. மூர்த்தி ஆங்கிலத்தில் எழுத எஸ். கணேசன் தமிழில் தந்திருக்கிறார். இந்நூல்  அமரர்.பேராசிரியர்  கே . சுவாமிநாதன் நினைவு போற்றி வெளிவந்திருக்கிறது.

 இராஜாஜி, ஓசூர் கிராம முன்சீப்பின் மூன்றாவது மகனாக டிசம்பர் 10 1878 அன்று பிறந்தவர். சட்டம் பயின்றவர். சேலம் நகரில் கிரிமினல் வழக்கறிஞராகப் பணியாற்றியவர்.

கோகலே அழைப்பின் பேரில்  தென்னாப்பிரிக்காவிலிருந்து இந்தியா வந்த காந்தி சென்னைக்கு 1919ல் வருகை தருகிறார். இராஜாஜி சென்னையில்வைத்துக் காந்தியைச் சந்திக்கிறார்.1921ல் மகாத்மா அழைப்பின்பேரில்  இராஜாஜி  முழு நேர சுதந்திரப்போராளியாகிறார்.

1921ல் முதன் முறையாக சிறை செல்கிறார். திருச்செங்கோட்டில் ஆசிரமம் தொடங்கி ஏழைகளையும் தாழ்த்தப்பட்டோரையும் இணைத்துக்கொள்கிறார்.

1935 க்குப்பிறகு சென்னை மாகாண முதலமைச்சராகிறார். முதன் முதலில் மதுவிலக்கை அமுல் படுத்துகிறார். ஹரிஜன் ஒருவரை தனது அமைச்சரவையில் பொறுப்பாக்குகிறார். இந்துக்கள் எந்த சாதியினராக இருந்தாலும் ஆலயப்பிரவேச உரிமை உண்டென  அதனை நடைமுறைப்படுத்துகிறார். இந்தியாவிலிருந்து பாகிஸ்தான் பிரிந்து போவதை முதன் முதலாக அங்கீகரித்த தலைவர் இராஜாஜியே. சுதந்திர இந்தியாவில் வங்காள கவர்னராகவும் இந்திய கவர்னர் ஜெனரலாகவும் பணிபுரிந்தார். நேரு அமைச்சரவையில் உள்துறை அமைச்சரானார். சென்னை ராஜதானிக்கு முதலமைச்சரானார்.

மகாபாரதம் இராமாயணம் என  இலக்கிய நூல்களை எழுதினார்.  சாகித்ய அகாதெமி விருது பெற்றார்.அணு ஆயுதங்களுக்கு எதிராக தொடர்ந்து குரல் கொடுத்தார்.  அமெரிக்க ஜனாதிபதி கென்னடியை ச்சந்தித்து விவாதித்து இருக்கிறார்.

94 வயதில் இயற்கை எய்தினார்.

இரண்டு இந்தியர்கள் இராஜாஜியின்  புரிதலுக்கும் அரசியலுக்கும் அடித்தளமிட்டனர். ஒருவர் விவேகானந்தர் அடுத்தவர் பாலகங்காதர் திலகர்.

தம்மைப்போன்ற மன நிலையில் இருந்த  மாகவிசுப்ரண்ய பாரதியை சந்திக்கிறார். பாரதியைப்பற்றி நூலாசிரியர் ஆர். கே  மூர்த்தி பின் வருமாறு எழுதுகிறார்.

‘..அதுவரை கற்றறிந்த சான்றோர்கள் சமுதாயத்தில் மேல்தட்டு மக்கள், ஆடம்பர வசதிகளும் படாடோபமான வார்த்தை விளையாட்டுகளும் கொண்டோரின் கைப்பாவையாக இருந்து வந்த தமிழை பாமரனுக்காக மீட்டுத்தந்தார். சாலைகளில் காணப்படும் சாதாரண மனிதனின் பேச்சுத்தமிழை அவர் பயன்படுத்தினார். இது தமிழ் பண்டிதர்களை உலுக்கியது. அவர்கள் அவரைத் தடுக்க முயன்றனர். ஆனால் அவர்  அதற்குள்  வெகுதூரம் முன்னே சென்று மக்கள் கவியாகிவிட்டார்.’

சேலத்தில்  இராஜாஜி வக்கீலாகப் பணியாற்றிய போது இரண்டு ஹரிஜனச் சிறுவர்களை ப்பொது ப்பள்ளிக்கூடத்தில் சேர்க்கிறார். பிரச்சனை பூதாகாரமாகிறது. பள்ளி ஆசிரியர் இந்த   இரண்டு ஹரிஜனச் சிறுவர்களால் 200  ஜாதி இந்துப்பிள்ளைகள் பள்ளியை விட்டு நின்றுவிடுவார்களே என ஆட்சேபிக்கிறார்.

’பள்ளியை அழித்து விடாதீர்கள்’ என எச்சரிக்கிறார்.

இராஜாஜி ஹரிஜனச்சிறுவர்கள் அப்பள்ளியில் படித்தே ஆகவேண்டும் என்கிறார். சில ஜாதி இந்துப்பிள்ளைகள் பள்ளியை விட்டு நின்றுதான் போனார்கள். பலர் தொடர்ந்து படித்தார்கள்.  அந்த இரண்டு ஹரிஜனப்பிள்ளைகளில் ஒருவன் படித்துத்தெர்ந்து  அரசு வேலைக்குப் போய்விடுகிறான்.

1917 ல் சிதம்பரம் நகரில் ஹரிஜங்களுக்குப் பள்ளி நடத்திய  சுவாமி சஹஜானந்தாவுக்கு  சேலம் நகரில் இராஜாஜி  சிறந்த வரவேற்பு கொடுக்கிறார்.   இது கண்டு சேலம் பிராமணர்கள் ஆத்திரப்படுகின்றனர். இராஜாஜியை ஜாதி விட்டு பகிஷ்காரம் செய்வது என்று முடிவு செய்கின்றனர். இராஜாஜி அப்பிராமணர்கள் செயலைத் துச்சமென ஒதுக்குகிறார்.

முதலில் இராஜாஜி ஹிந்தி மொழி பயில்வதை ஆதரிக்கிறார். தானும் கற்றுக்கொள்கிறார். ஆனால் ஹிந்தி மொழி ஆர்வலர்கள், அம்மொழிபேசாத பிரதேச மக்களின் தொண்டைக்குள் அதை வலுக்கட்டாயமாக  திணிக்க முயன்ற மொழி வெறியே அவரது மனதை புண்படுத்தியது.

‘ஹிந்தி மொழி மட்டுமே அரசுமொழியாக இருக்கவேண்டுமென்று கேட்டுக்கொண்டதன் மூலம் அவர்கள் அம்மொழி மீதிருந்த மரியாதையை சேதப்படுத்தி விட்டனர்.’  என்கிறார் இராஜாஜி.

‘1937ல் நான்  சென்னை மாகாண பிரதமராக இருந்தபோது ஹிந்தியை கட்டாயபாடமாக்கினேன்.காலம் மாறிவிட்டது. ஹிந்தி மொழியைத் தூக்கிப்பிடிப்பவர்கள் பெரும்பாலும் ஹிந்தி மொழியை தம்மொழியாகக்கொண்டவர்கள் மொழிவாரியான தலைமை பொறுப்பு கிடைப்பதற்காக அவர்கள் இதனை ஆதரிக்கிறார்கள்.’

‘ஹிந்தி எதிர்ப்பு ஹிந்தி மொழிக்கு எதிரானதல்ல’ என்கிற சூக்குமங்களை இராஜாஜி எடுத்துச்சொல்கிறார்..

கிலாஃபாத் இயக்கத்தில் தீவிரப்பங்கு கொண்டார் இராஜாஜி. திருச்சியில் நடைபெற்ற மாபெரும் கூட்டத்தில்  காலிப்புக்கு எதிராக பிரிட்டன் கொண்டு வந்த   நடவடிக்கையை ரத்து செய்யத்தீர்மானம்    ஒன்றை  நிறைவேற்றுகிறார்.

இரத்தின சபாபதி கவுண்டர் என்ற ஜமீன் 12 ஏக்கர் நிலத்தை இராஜாஜியிடம் ஒப்படைக்கிறார். அதனில் இராஜாஜி காந்தி ஆஸ்ரமத்தை அமைக்கிறார். அந்த ஆஸ்ரமத்தை முதலில் ஒரு காங்கிரஸ்காரராக வாழ்க்கையைத் துவங்கி பின்னர் பிராமணர் அல்லாதவர்கள் நலன் பக்கம் இழுக்கப்பட்டு, திராவிட இயக்கத்தின் முன்னோடியாக இருந்தவரும் இராஜாஜியின் நண்பருமான பெரியார் ராமசாமி நாயக்கர் திறந்து வைத்தார். இராஜாஜியின் நண்பர் என்றால் அது  அய்யா  பெரியார் என்பது தமிழ் நாட்டு மக்கள் அனைவரும் அறிந்த செய்தியே.

ஹரிஜனங்களை ஆச்ரமத்தில் சேர்த்தமைக்காக ஜாதி இந்துக்கள் ஆஸ்ரமத்திற்கு கொடுக்கும் வழக்கமான பாலை  நிறுத்திவிடுகின்றனர். ’ வைத்து  நாங்கள் வாழக்கற்றுக்கொள்வோம்’ என இராஜாஜி எதிர்க்குரல் முழங்கினார்.

இராஜாஜியின் கொள்கைகள்.  1. மது ஒழிப்பு 2.ஊரகப்பகுதிகளில் கடன் நிவாரணம் 3. ஹரிஜனங்கள் கோவிலுக்குள் அனுமதி 4. மக்கள் காதி கைத்தறி துணி அணிவது 5.இந்து முஸ்லிம் ஒற்றுமை. இவையே  இச்சமூக வளர்ச்சிக்கான  திறவுகோல் என இராஜாஜி கண்டுகொண்டார்.

மது விலக்கினால் அரசுக்கு  ஏற்படும் வருவாய் இழப்பை  விற்பனை வரி மூலம் சரிக்கட்டலாம் என்கிற இராஜாஜியின் யோசனையை பிரிட்டீஷார் அவ்வளவு எளிதாக ஏற்றுக்கொண்டுவிடவில்லை. இன்று காமதேனு வாக உள்ள விற்பனைவரியினை அன்றே  கண்டு சொன்னவர் இராஜாஜி.

தஞ்சாவூர் நிலச்சுவான்தாரர்களுக்கும்  ஏழை விவசாயிகளுக்கும் இடையே பாலமாக அமைந்த ‘தஞ்சாவூர் பண்ணையாள் சட்டம்’ கொண்டுவந்தார். அந்தப்பகுதி கம்யூனிஸ்ட்களின் போராட்டத்தை இராஜாஜி  வலுவிழக்கச்செய்தார் என்பதுவும்  நாம் அறிந்த வரலாறு.

’மாறிவிட்ட நிலமைகளுக்கு ஏற்ப பிராமணர்கள் தங்களை மாற்றிக்கொள்ள வேண்டும். எவ்வளவு சீக்கிரம் அவ்வாறு செய்கிறார்களோ அது அவர்கள் சமூகத்திற்கு நன்மை பயக்கும்’ இது இராஜாஜியின் புத்திமதியாக இங்கே  ஆசிரியரால் குறிப்பிடப்படுகிறது.

மொழிவழி மா நிலத்தை இராஜாஜி ஏற்றுக்கொண்டவரில்லை. ஆனால் அதுசென்னைச் சட்டசபையில் ஒப்புதல் பெற் றுவிடுகிறது. இராஜாஜி ஒரு ஜன நாயகவாதி.சட்டப்பேரவையில்  ஒப்புதல் பெற்றுவிட்ட தீர்மானத்திற்கு  எதிராக வரும்  ஒரு யோசனையை அவரால் சகித்துக்கொள்ளமுடியாது.இதனை அழகாகப்பதிவு செய்துள்ளார்.

 நேதாஜி சுபாஷ் காங்கிரசின்  தலைவராகிறார்.  நேருவும் இராஜாஜியும் செயற்குழுவில்  அவரோடுபணியாற்ற மறுக்கிறார்கள். போஸ் திணறிப்போகிறார். தலைவர் பதவியில் அதிகாரம்  ஏது ?  அந்த மகாத்மா காந்தியிடம்தான் பலமும் ஆதார சக்தியும் இருக்கிறது என்பதை போஸ் அறிந்துகொள்கிறார்.  உடனே பதவி விலகினார். இந்தக்கொந்தளிப்பான நாடகத்தில் இராஜாஜி பெரும்பங்காற்றினார் என்பதை  ஆர். கே மூர்த்தி  பதிவு செய்கிறார்.

1936ல் இராஜாஜியை காங்கிரஸ் தலைவர் பதவிக்கு தேர்ந்தெடுத்து அவருடைய சேவைகளை அங்கீகரிக்கும்படி  காந்தியை பட்டேல் தூண்டினார். இராஜாஜி அதனை ஏற்க மறுத்துவிடார்.

இந்திய அரசியல் களத்தில்  சோதித்து பார்க்கப்பட்ட ஆயுதங்களான அஹிம்சைமுறையிலான ஒத்துழையாமையை  காந்தி அறிமுகப்படுத்திய[போது ஜின்னா ஆட்டம் கண்டு போனார். மிக உயர்ந்த சட்ட அறிவு கொண்ட அவர் அரசியல் சாஸன முறைகள் மூலம் இந்தியாவிற்கு சுதந்திரம் கொண்டுவர முடியுமென நம்பினார். இப்படி இந்நூலில் பதிவு தொடர்கிறது

பாகிஸ்தான்  பிரிவினை கோரிக்கை சரிதான் வேறு வழியில்லை  இது இராஜாஜியின் குரலாக இருக்கவே  மகாத்மா இராஜாஜியை,  இனியும் தொடர்ந்திருக்க வாய்ப்பில்லை  காங்கிரசிலிருந்து விலகிவிடுங்கள் என்று கூற அவரும் விலகிவிடுகிறார்.

மும்பையில் அருணா( பின்னாளில்  அசப் அலி யை மணந்தவர்) ‘க்வாலி தலாப்’  மைதானத்தில் மிகப்பெரிய மேடையில் மூவர்ணக்கொடியை ஏற்றி பிரிட்டீஷாருக்கு எதிராகத் துணிச்சலாக நின்றார். சிங்கத்தை அதன் குகையிலேயே சந்திக்கத் துணிந்த இளம்பெண்  அருணா  என்று சரித்திரம் பேசியது.

1946ல் கடற்படை சிப்பந்திகளின் புரட்சி பற்றிக் குறிப்பிடும்போது  அது பிரிட்டீஷ் அரசுக்கு விடப்பட்ட சவால் என்று ஆசிரியர் குறிப்பிடுகிறார்.

பதினைந்து மாகாணங்களில் பன்னிரெண்டு மாணங்கள் காங்கிரஸ் தலைவர் பதவிக்கு சர்தார் பட்டேலின் பெயரை பரிந்துரைக்கிறது. காந்தி பட்டேலை விலகிக்கொள்ளச்சொல்லிவிட்டு நேருவையே தேர்ந்தெடுக்கிறார்.

நேதாஜிக்கும் பட்டேலுக்கும் வரலாற்றில் அனேக எதிர்வினைகள் மகாத்மாவால் நேர்ந்திருப்பதை வாசகன் உணர்ந்தே இந்நூலை வாசிக்கமுடிகிறது.  

இராஜாஜி வங்காள கவர்னராய் வருவதை  சுபாஷின் சகோதரர் எதிர்க்கிறார் கருப்புக்கொடிகள் வரவேற்க கல்கத்தா  டம் டம் விமானநிலையத்தில் இராஜாஜி வந்து  இறங்குகிறார்.  நேதாஜி சகோதரர் சரத் சந்திர போசின் இல்லம் சென்று அவரோடு பேசி ஒத்துழைப்பு பெறுகிறார்.

1947 டிசம்பரில் காந்தி மீது நிகழ்த்தப்பட்ட ஒரு   வெடிகுண்டு தாக்குதல் தேசபிதாவுக்கு உள்ள ஆபத்தைச் சுட்டிக்காட்டியது என்று  ஆசிரியர் பதிவு செய்கிறார் .

மனோபாவத்தில் நேருவும் பட்டேலும் இரு துருவங்கள் என்பதைச்சரியாகக்குறிப்பிடுகிறார் ஆர் .கே மூர்த்தி.

 ஜூன் 21 1948 கவர்னர் ஜெனரலாக பதவி ஏற்றார் இராஜாஜி.

ஹைதராபாத் அரசர் நிஜாம் இந்திய அரசுடன் இணைய மறுக்கிறார்.மோதல் நிகழ்கிறது. ஹைதராபாத் இந்தியாவுடன் இணைக்கப்படுகிறது. அந்த காலகட்டத்தில்

 தெலுங்கானா பிராந்தியத்தில் கம்யூனிஸ்டுகளும் தொல்லைகளைத் தூண்டிவிடுவதில் ஈடு பட்டனர். இச்செய்தியும் ஒரு கொசுறாக வாசகனுக்குக்கிட்டுகிறது.

காஷ்மீர் பிரச்சனை, இந்திய திபேத் கொள்கையில் மாறுபாடு இவை இராஜாஜியையும் நேருவையும் பிரித்தன.

நாடு  விடுதலை அடைந்து  முதலாவது பொதுத்தேர்தலுக்குத் தயாரானது. சென்னை ராஜதானியில் மொத்தமுள்ள 375 இடங்களில் காங்கிரஸ் 152 சுயேச்சை  62  கம்யூனிஸ்ட் 62 உழவர் கட்சி 38 என்று மக்கள் வாக்களித்தார்கள். கம்யூனிஸ்ட் கட்சியினர் இன்று கால்வலிக்க சீட்டுக் கேட்டு எங்கெங்கோ நிற்கின்ற நிலை ஏன் வந்தது என்பதை மட்டும்  ஆராய்ச்சி செய்வதில்லையே.

இராஜாஜி சென்னை மாகாண முதல்வரானார், பிரச்சனைகள் தொடர்ந்தன. போலிசார் ஊதிய உயர்வு கேட்டு நடத்திய   போராட்டத்தைக்கையாண்டது அவருக்கு எதிரானது

.புதிய கல்விக்கொள்கையை க்கொண்டு வந்த இராஜாஜி  சரியான கிடுக்கிப்பிடியில் மாட்டிக்கொண்டார். ஜாதியை பின்புறவழியாக்கொண்டு வருகிறார் இராஜாஜி எனப் பிரச்சாரம் தொடர்ந்தது. நாடு சுதந்திரம் பெற்று பொருளாதார நிலையில் தத்தளித்துக்கொண்டிருந்த சூழல் நல்ல பள்ளிக்கூடங்கள் இல்லை. பயிற்சி பெற்ற ஆசிரியர்கள் இல்லை. உபகரணங்கள்  எதுவும் இல்லை. எங்கும் பஞ்சம்.இராஜாஜி கொண்டுவந்த கல்வித் திட்டமோ தவறாகப்புரிந்துகொள்ளப்பட்டது.

வேறுவழியின்றி அவர் கொண்டுவந்த கல்விக்கொள்கை- தொழிற்பயிற்சி அவரையே  வெளியேற்றியது.

 

தெலுங்கு மொழி பேசும்  ஆந்திர மக்களோ தனி  ஆந்திரா மா நிலம் கேட்டுப்போராடினர் பொட்டி ஸ்ரீராமுலு உண்ணா விரதமிருந்து உயிர் விட்டார்.

இவை  அவர் வெளியேறப் போதுமானவையாக இருந்தன. இராஜாஜி  வேண்டியவர்க்கு  அறிவுரை சொல்லும் ஒரு  மூதறிஞர் ஆனார்.

‘தேவையான போது  இரட்சகரை நாடுவதும் வேலையானதும் இரட்சகருக்கு எதிராக மாறுவது தொன்று தொட்டு நிகழ்ந்துவருவதுதான். மனிதனின் பலவீனம்தான் சரித்திரத்தை மீண்டும் மீண்டும் நிகழ்த்துகிறது  என்கிறார் மூர்த்தி.

இராஜாஜியைப்பயில்வது இந்திய அரசியலைத் தமிழக அரசியலை ஆழமாக விளங்கிக்கொள்ள உதவலாம். எந்த முன் முடிவும் வைத்துக்கொள்ளாது வாசகன் இராஜாஜியை அணுகினால் மட்டுமே  அது சத்தியப்படும்.

-----

Thursday, June 30, 2022

இதனை இதனால் கதை

 இதனை இதனால்                 -எஸ்ஸார்சி

 

என் பையனுக்கு முடிச்சூர் பக்கமாய் வீடு வாங்கினேன்.வாங்கும் போதே அகவிலைதான்.  அருகில்  ஓடுகிறது ராட்சதன் அடையாறு.  மூச். அதெல்லாம்  அப்போது யார் எனக்குச் சொன்னார்கள்.   செம்பரம்பாக்கப் பெருவெள்ளம்   சென்னையை  பார்த்திராத  அந்தக்காலம். நடக்கச் சோம்பேறி சித்தப்பன் வீட்டில் பெண் கட்டினான்  என்பார்கள். அந்தக்கதைதான்.நான் வாடகைக்குக் குடியிருக்கும் வீட்டின்  வெகு அருகில்  விலைக்கு வந்த வீடு அது.

  ஜாதகப்படி எட்டாம் இடத்தில்  ஈசுவரப்பட்டம் பெற்ற  அந்தச்சனி பகவான்  வந்திருக்கிறார் சட்டென்று என் புத்திக்கு உறைக்கவில்லையே.  அப்படி   அது உறைக்காமலும்  இருக்க அவனே பார்த்துக்கொள்வானாம்.  பணி ஓய்வின் போது எனக்கு  மைய அரசாங்க கொடுத்த பணிக்கொடை இத்யாதிகள் எல்லாம்சேர்த்து அப்படி இப்படி  என்று  என்   பையன் பெயரில்  வீடு வாங்கினேன்..

 ’தாலி கட்டிய கையோடு பையனுக்குத்   தனிக்குடித்தனம்  வைத்துவிடு. இயன்றவரைக்கும்  தாயும் தந்தையும் தனியாக இருப்பதுதான்  உசத்தி. அந்த மகாவிஷ்ணுவே வந்து உன்னைச் சமாதானம் செய்தாலும்  ஒன்றாய் இருக்க மட்டும் ஒத்துக்கொண்டு விடாதே ’என் மூத்த  நண்பர் சொன்னக் கனமான யோசனை. அவர் என்ன பாடு பட்டோரோ.

 கல்யாணமாகி  குடித்தனம்  வைக்கும்போதே நாமே தனியாக  ஜாகை வைத்துவிட்டால்  அது உசிதம்.   மருமகள்  வீட்டுக்குள் அடி எடுத்து  வைத்தாள். ஒற்றுமையாய் இருந்தக்  குடும்பத்தைப்பிரித்துகொண்டு தனியாகப்போய்விட்டாள்.  இந்தக் கெட்டபெயர்தான் அவளுக்கு எதற்கு? என் மனைவி சாதுரியமாக எப்போதேனும் பேசிவிடுவாள்.

 ஊனக்கண்ணிற்கு அகப்படா அசுரன் கொரானா. அவன்  ஜனிப்பதற்கு முன் பையன்  அமெரிக்கா தேசத்துக் கலிபோர்னியாவுக்குப் போய்விட்டான். அவன்  மனைவியும்  உடன் போனாள் பேத்தியும் அவர்களோடு போயாயிற்று.

பையனுக்கு வாங்கிய புது  வீட்டில்  ஒரு மதுரைக்காரன் வாடகைக்குக் குடியிருந்தான்.  ஊர் ராசி.  சென்னையில் மதுரைக்காரர்களும் திருநெல்வேலிக்காரர்களும்தான் கெத்தாய் பவனிவருகிறார்கள்.  வாடகைக்கு வரும்போதே  மதுரைக்காரன் வீட்டில் ‘கார் பார்க்கிங்’ இருக்கிறதா என்று கவனமாய் விசாரித்து வந்தான். அவனிடம் கார் ஒன்றும் இல்லை. மதுரையிலிருந்து ஊறுகாய் டப்பிகள் ஏற்றிக்கொண்டு  அந்த குட்டியானை ஒன்று  வரும்.  குட்டியானை என்றால் அதுதான் மினி லாரி உங்களுக்குத்தெரியாத சமாச்சாரமா.

. ஊறுகாய் பேக்கிங்க்கள்  கார் பார்க்கிங்  பகுதியில் அடைத்துக்கொண்டு கிடக்கும். அவை அங்கங்கு வண்டி ஏறிப் போகும் போனவை.  திரும்ப வராது. புதியவை வரும். அமரும். புறப்படும்..

கொரானா காலத்து வாடகை பாக்கி முப்பதனாயிரம் மதுரைக்காரன்  எனக்குத் தரவேயில்லை. ‘பாக்கலாம் சார்’ என்பான். அவன்  பார்க்கவேயில்லை. சமீபமாக ஒரு  ரெண்டு மாத வாடகை டிமிக்கி. மூன்றாவது மாதம் ஓடிக்கொண்டிருக்க வீட்டுச் சாவியை என் பக்கத்துவீட்டு ஆசாமியிடம் கொடுத்துவிட்டு ஓடியே போய்விட்டான்.

என் மனைவி ’மதுரைக்காரன்  எவ்வளவோ நல்லவன் வீட்டுச் சாவியை அவனே எடுத்துக்கொண்டு போயிருந்தால்  நாம் என்ன செய்வது’ சொல்லிக்கொண்டாள். அவளுக்கும் சொந்த ஊர் மதுரைப்பக்கம். அந்த எஃபெக்ட்  எப்போதும் உண்டு..

வாடகைக்கு  விட்ட என் பையன் வீட்டைத்திறந்து பார்த்தேன். வீடு மனிதர்கள் குடியிருந்தமாதிரிக்கு இல்லை. மூன்று ஃபேன்களில் ரெண்டு ரிப்பேர். டாய்லெட் நாறிக்கிடந்தது.  பாத் ரூம் அலங்கோலம்.  ஜோராய் வெள்ளைஅடித்தால்தான் இனி வாடகைக்கு விடலாம். ஜன்னல் கதவுகள் உடைந்து திருகிக்கொண்டு கிடந்தன. தோட்டக்கதவு திறக்க வரவேயில்லை. மூச்சைப்பிடித்துக்கொண்டு திறந்தேன். ஒரு கறிவேப்பிலை ஒரு வாழை ஒரு நெல்லி மரங்கள் பிராணனை வைத்துக்கொண்டு கோபமாய்  என்னை முறைத்தன. தப்பு முளை மாங்கன்று தள தள என்று வளர்ந்து இருந்தது. அது ஏன் தப்பு முளைகள்  மட்டும் வீர்யத்தோடு காட்சி தருகின்றனவோ, சூட்சுமம் பிடிபடுவதில்லை.

அண்ணாந்து பார்த்தேன். பக்கத்து வீட்டுக்காரன் என் பையன் தோட்டத்து அத்தில்  ஜன்னல்  வைத்து இருக்கிறான். எல்லையாயுள்ள  தாய்ச்சுவரைத்தாண்டி ஜன்னல் கதவை நீட்டி  அதன் மேல் சன் ஷேடும் அமைத்து விட்டிருந்தான். அவனுக்கு த்தாய் சுவரோடு சரி. என் பையன் தோட்டத்து மண்ணில்  ஒண்ணரை அடிக்கு  ஆக்கிரமித்து இருந்தான்.  எனக்கு வயிற்று எரிச்சலாய் இருந்தது. இது என்ன அக்கிரமம் அநியாயம். நாம் இப்படிச் செய்தால் அவன் சும்மா இருப்பானா.  விர்ரென்று போனேன்.அடுத்த வீட்டுக்காரனை அழைத்தேன்.

அவன் மனைவி வெளியில் வந்தாள். ‘ என்ன’

‘ என்ன   இது அக்கிரமம்  என் வீட்டு தோட்டத்து அத்துல ஜன்னல வச்சி கதவயும் வெளியில தொறந்து விட்டு இருக்கிங்க சன் ஷேடு வேற மேல நிக்குது   எல்லாமே தப்பு.  இத உடனே  எடுத்துடணும்’

‘ எங்க செவுறுல நாங்க  ஜன்னலு வச்சம் அதுல உனக்கென்னா போச்சி’

‘ எங்க பக்கமால்ல  நீட்டி வச்சிருக்கிங்க’

‘இப்ப  அதுக்கு என்ன செய்ய’

‘ அத எடுத்துடணும்’

‘ வேற வேல எதனா இருந்தா பாரு’

அந்த அம்மாள் உள்ளே சென்று விட்டாள். என் பையனுக்கு தகவல் சொன்னேன். வாட்ஸப்பில் ஜன்னலைப்  படம் எடுத்து அனுப்பினேன்.  வாடகைக்கு  குடி இருந்த  மதுரைக்காரர் இந்த ஜன்னல் வைத்த  விஷயம் என்னிடம் சொல்லவேயில்லை. அவர்தான்  வீட்டு சாவியே என்னிடம்  நேரில் கொடுக்காமல் போனவராயிற்றே. போன் போட்டாலும் எடுப்பாரா என்ன?

‘ இன்னொரு முறை  அவர்களிடம் எடுத்து  சொல்.   கொஞ்சம் கெஞ்சு. பிறகு பார்ப்போம்’ பையன் சொன்னான்.

 என் பையன் சொன்னபடிக்கு  பக்கத்துவீட்டுக்காரரை நேரில் பார்த்துச் சொன்னேன்.

‘’சார் அந்த ஜன்னலு’

‘ எந்த ஜன்னலு  எங்க தோட்டத்து அத்துல தப்பா வச்சியிருக்கிங்க அத எடுத்துடணும்’

‘ நானு வச்சத  நானே எடுக்குணுமா’

‘தப்பால்ல வச்சிரிக்கிங்க’

‘ நீ  அங்க வூடு கட்டு  செவுறு எழுப்பு  அப்ப எடுக்குறன் இப்பக்கி  ஒண்ணும் ஆவாது’

‘அப்ப  நா என்ன செய்யறது’

‘ நீ என்ன செய்யினுமோ செஞ்சிகு அவ்வளவுதான். ஏ  கிறுக்காப்பா நீ  ரவ மண்ணுக்கு என்ன ஆத்திரம் என்ன ரோசம் பாரையா’

அவர் போய்விட்டார்.

அந்தப்பகுதிக்கு ஒரு குடியிருப்போர் சங்கம் இருந்தது. அந்த செகரெட்ரியிடம் போனேன்.  வீட்டுக்கு  மாத  சந்தா சரியாகக்கட்டியிருந்தேன்.  பக்கத்து வீட்டுக்காரன் ஜன்னல் வைத்த  விஷயம் சொன்னேன். நியாயம் வேண்டுமென்றேன். அவர் சிரித்துக்கொண்டார். ‘இது ஆவுற கதையா’ என்றார்.

அந்த எரியா முனிசிபல் கவுன்சிலர்  வீட்டு  விலாசம்  தேடிச்சென்று முறையிட்டேன்.’ நான் இப்பத்தான் புதுசா வந்திருக்கேன். உங்க விஷயம்  அங்க  வந்து பாக்குறேன்.’ பதில்  எனக்குச்  சட்டமாய் சொன்னார்.

கதை ஒன்றும் ஆகாது தெரிந்துவிட்டது. வீட்டுக்கு வாஷிங்க் ரிப்பேர் பார்க்க ஒரு டெக்னீசியன் வந்திருந்தார். அவரிடம் என் பையன் வீட்டு அத்தில்  அடுத்த வீட்டுக்காரர்  ஜன்னல் வைத்துவிட்ட  கதை  சொன்னேன். ‘போலிசுக்கு போங்க ஒரு மனு கொடுங்க ஆனா  உங்களுக்கு பத்து  அவுருக்கு பத்து செலவு வரும்’

‘ பத்துன்னா’

‘பத்தாயிரம்தான். அது எல்லாம் இப்ப  ஒருபணமே இல்ல.  நாளைக்கு நீங்க  உங்க பையன் வீட்டை விக்கிணும்ல’

சரியாகத்தான்’ சொல்கிறார்’

எனக்கு ஒரு யோசனை தோன்றியது. உடன் செயலில் இறங்கினேன்.

’வீடு விற்பனைக்கு’ ஒரு அட்டையில் எழுதி அதன் கீழ் என் தொலைபேசி எண் எழுதி என் பையன் வீட்டு  வாயில் கேட்டில் கட்டினேன். அடுத்த வீட்டுக்காரர்  அதனை வந்து பார்த்து படித்துவிட்டு தலையை சொறிந்துகொண்டே போனார்.

என் தொலைபேசிக்கு ஒரு அழைப்பு வந்தது.

‘ சார். உங்க பையன் வீட்டுக்கு அடுத்த வீட்டுக்காரர் பேசறேன்’

‘ சொல்லுங்க’

‘ நெசமாவே வீடு விக்க போறிங்களா’

‘ என்ன விளையாடுறீங்களா’

‘  வீடு  சேல்ஸ் முடிஞ்சி போச்சி’

‘என்ன சொல்றீங்க’

‘ வீட்ட  ஆட்டுத்தொட்டி  தோல் மண்டி ஆசாமிகிட்ட  பேசி முடிச்சிட்டன்’

‘என்ன சொல்றீங்க சார்’

‘இனிமே அந்த கார் பார்க்கிங்க்கு ஊறுகா பேகிங்க்  வராது. மதுரைக்காரரு காலிபண்ணிகிட்டு  போயிட்டாரு.  தோலு  பிசினஸ் ஆளு கெரயம் வாங்கிகிட்டு  வருது. ஆட்டு தோலுவதான் மலை மலையா குவிஞ்சி கெடக்கும் பாத்துகுங்க’

‘சார்  நாங்க பக்கத்து வீட்டுலகுடியிருக்கறமே. ஆட்டுத்தொட்டி அஸ்ஸாமிகிட்ட  உங்க வீட்ட  வித்திங்கன்னா என்னா  ஆவுறது’‘ ’

ஆமாம் சாரு உங்க செவுத்துல  நீங்க ஜன்னலு வக்கிறீங்க  அது அத்து தாண்டி வருது.. தப்புன்னேன்.  எங்க செவுறு  நாங்க ஜன்னல் வப்பம்னு சொல்றீங்க.   எங்க வீடு  இப்ப நாங்க அத   யார்கிட்டயும் விப்பம் அவ்வளவுதான்’

‘சார் நா  அந்த ஜன்னல்ல மரக்கதவ எடுத்துடறன். கண்ணாடி  ஸ்லைடிங் டோர் போட்டுகிறேன்.  உங்க அத்துல   அந்த ஜன்னல் வரவே வறாது. அந்த சன் ஷேட் டையும் தட்டி வுட்டுடறன்’

‘ பேசறது நீங்கதானா’

‘  ஆமாம் சாரு. உங்க வூட்ட அப்பிடியெல்லாம் கன்னா பின்னான்னு வித்துடமாட்டிங்க  தெரியும் சாரு.’  பேச்சில் மரியாதை மிளிர்ந்தது.

மவுனமானேன்.

அவர் அந்த  ஜன்னலுக்கு  ஸ்லைடிங்க் டோர் போட்டார். சன் ஷேடயும் தட்டிவிட்டார். நான் என் பையன் வீட்டு வாசலில்  ‘அவுஸ் ஃபார் சேல்’  அறிவிப்பை கழட்டிவிட்டு ‘டு லெட்’போர்டை  இப்போதுதான் மாட்டிவிட்டேன்.

மதுரைக்காரர்கள் யாரேனும்  வந்து. வாடகைக்கு வீடு வேண்டும்  என்று உங்களைக்கேட்டால் எனக்கு  அவசியம்  ஒரு போன்  போடுங்கள்.

------------------------------------

 

Thursday, May 19, 2022

விட்டல் ராவின் ஓர் அன்னாடு காச்சியின் சேலம்

 

ramachandran sundaresan <essarci@yahoo.com>
To:Editor Virutcham
Thu, Apr 28 at 7:25 PM

விட்டல் ராவின் எழுத்துச்சித்திரம்

,’ஓர் அன்னாடு காச்சியின் சேலம்’.                   -எஸ்ஸார்சி

 வெளியீடு சந்தியா பதிப்பகம் சென்னை 83.  145 பக்கங்கள் விலை ரூ 150.

விட்டல் ராவ் மூத்த எழுத்தாளர். பெங்களூரில் தற்காலம் வசித்துவருகிறார்.தொலைபேசித்துறை எத்தனையோ எழுத்தாளர்களை தமிழ் எழுத்துக்களத்திற்கு அனுப்பி இருக்கிறது. அந்த எழுத்தாளர் திருக்கூட்டத்தில் விட்டல் ராவ் பெருமைக்குறியவர். 

சேலம் அவர் இளமைக்காலத்தில் வாழ்ந்த பெரு நகரம். ஒரு சாதாரணன் பார்வையில் சேலம் எப்படி இருந்தது என்பதனை விருவிருப்பான நடையில் ‘ஓர் அன்னாடு காச்சியின் சேலம் என்னும் நூலாக விட்டல் ராவ் படைத்துள்ளார். இது  உலர் சுவை கட்டுரை நூல் அன்று. தன் வரலாறும் அன்று .புதினம் என்றும் இதனைச்சொல்லமுடியாது. விட்டல் ராவின்  சுவாரசியமான எழுத்துக்களால் உருவான எழுத்துச்சித்திரந்தான்  இந்நூல்.

விட்டல் ராவ் எழுதிக்குவித்தவை  நாவல் 12, குறுநாவல்2, சிறுகதை தொகுப்பு 4, கட்டுரை நூல் 10. இந்த நூற்றாண்டின் சிறுகதைகள் என்னும் மாபெரும் இலக்கியப்பணியை மூன்று பெரும் தொகுதிகளாகச் சாதித்தவர் விட்டல் ராவ்.  வெளியீடு கலைஞன் பதிப்பகம்.’ நதி மூலம்’ இவரின் பேசப்பட்ட புதினமாகும்.

எழுத்துமட்டுமல்ல இவர் நுழைபுலம் இன்னும் , ஓவியம் சிற்பம் திரைப்படம் என்று விரிந்து செல்கிறது.  விட்டல் இசையில் ஈடுபாடும் நல்ல  குரல் வளமும் படைத்தவர்.

 ’ஓர் அன்னாடு காச்சியின் சேலம்’ என்னும் நூலை  எழுத்தாளர் அமரர் சா. கந்தசாமிக்கு அன்புக்காணிக்கையாக்கியுள்ளார்.என்னுடைய சக பயணியும் குடும்ப நண்பருமான கந்தசாமி என்று பெருமையோடுஅவரைக் குறிப்பிடுகிறார்.

சேலம் என் ஊர்,என் மண்,என்னை ஆளாக்கிய புனித பூமி. அதைப்பற்றி எழுதுவது என் கடமைகளில் ஒன்று என்று நிறைவோடு பேசுகிறார்.

12 பகுதிகளாக  இந்நூல்  வாசகனுக்கு வழங்கப்பட்டுள்ளது. ’குல தெய்வம்’ தொடங்கி ’சேலம் இன்று’ என்பதோடு நூல் முடிகிறது.

விட்டல் ராவின் குல தெய்வமான ‘எல்லம்மா’வை பவ்யமாய்க்குறிப்பிடுறார். சேலத்தில் பிரசத்திபெற்ற கோட்டை மாரியம்மன் கோவில் பற்றி எழுதுகிறார். கூடவே ஜாதிய சதி பற்றியும் இப்படி விமர்சிக்கிறார்.

‘ ஜாதீயத்தை  ஏற்படுத்தியவன் கூடவே தாங்கள் உண்டாக்கிய சாமிகளையும் உயர் ஜாதி கடவுள்கள், கீழ் ஜாதி கடவுள்கள் எனவும்,சட்டென பார்வைக்குப்படும்படியாய் வகைமைப்படுத்தி வைத்தான்.’

 தேர் முட்டி  அருகே இருந்த வில்வாத்திரி பவன் என்னும் உணவகத்தை அதன் சிறப்பை விளக்கமாகக்குறிப்பிடுகிறார்’பழுப்பேறிய வேட்டியை தூக்கி க்கட்டிக்கொண்ட வயதான பிராமணர்கள் அங்கு பரிசாரகர்களாக இருந்தனர் என்பதைப்பதிவு செய்கிறார்.

கிழக்கிந்திய கம்பெனியின் கர்னல் அலெக்சாண்டர் ரீட் (1792 வருடம் ) சேலத்தில்  கலெக்டராகவும் சூப்பரின்டெண்டாகவும் இருந்தவர். போலீசு,  என்ஜினியரிங், நீதி  இந்த மூன்று துறைக்கும் அன்றைய சேலம் மாவட்டத்துக்கு அவர் ஒருவரே.

அன்று மக்களிடம் கடிகாரம் கிடையாது. தினம் மூன்று பீரங்கிக்குண்டுகள் முழக்கப்பட்டன. காலை 6 மதியம் 12 இரவு 8 என்பவை  அந்த நேரங்கள்.

நேஷனல் ஓட்டல் என்னும் நட்சத்திர விடுதி கட்டப்பட்டபோது  எதிரே இருந்த சர்க்கிள் ஏரி காணாமல் போனதை வருத்தத்தோடு எழுதுகிறார்.

விக்டோரியா மைதானம் சூரிய அஸ்தமனத்திற்குப்பின் ஓரினப்பாலுறவு மைதானமாக மாறிய செய்தியை விடாமல் குறிப்பிடுகிறார்.

தான் படித்த சிறுமலர் உயர் நிலைப்பள்ளி பற்றிப் பெருமையொடு பதிவு செய்கிறார். அந்நாள் தலைமை ஆசிரியர் ரெவெரெண்டு ஃபாதர் புஷ்ப நாதர், ’சிறிய புஷ்பம்’ உயர் நிலைப்பள்ளி என்றுதான் குறிப்பிடுவாராம்.

நடிகர் அசோகன் அப்பள்ளியில் தாமஸ் என்ற பெயரில்படித்ததை இவண் நாம் அறிகிறோம்.

சேலம் மத்திய சிறைக்குப்பின்னே காடும் புதருமாய் மண்டிக்கிடக்கும். மாடர்ன் தியேட்டர்ஸ்ஸாரின்படப்பிடிப்புக்கள் அனேகம் அங்கு நடைபெறும். அங்குள்ள ஓடையைச்சுற்றி சிறுகளா,காரை,சூரப்பழம்,அழிஞ்சி,சங்கம்,கறிவேப்பிலைக்கு சக்களத்தி,காட்டிலந்தை,சப்பாத்தி, கள்ளி ஆகிய செடிகள் செழித்திருக்கும். இவை இவை பேசப்படுகின்றன.

‘பேரு சொல்லாம திங்கணும்,பேரு சொல்லி போட்டு தின்னா கசக்கும்,புளிக்கும்’ சங்கப்பழம் பற்றிச்சுவையான செய்தியை விட்டல் குறிப்பிடுகிறார்.

மாம்பழங்களின் வகை, மல்கோவா,கிளிமூக்கு,குதாதாத், ஜஹாங்கீர்,குண்டு ஈமாம் பசந்து,தில் பசந்து என சேலத்து அற்புதக்கனி குறித்து இனிமையாய்ச்சொல்லிப்போகிறார்.

 இராமாயண ஜடாயு என்னும் கழுகு மரித்த இடமான சுண்ணாம்புக்கரடு பற்றியும், கல்கி   ஒரு புதினத்தின் தலைப்பாய்க்குறிப்பிட்ட ‘பொய்மான் கரடு’பற்றியும் அனேக செய்திகளை இங்கே வாசகர்கள் அறியவாய்க்கிறது.

அயோத்தியாப்பட்டிணம்என்னும் ஊர் பற்றிய கதையொன்று வருகிறது. ராமனும் சீதையும் ராவண சம்ஹாரத்திற்குப்பிறகு  புஷ்பக விமானத்தில் அயோத்திக்குச் செல்கின்றனர். நடுவானில் இருட்டிவிடவே சேலம் பகுதியில் கீழிறங்கித் தங்கினர். விடிந்து மறு பயணம் புறப்படுவதற்குள்   பட்டாபிஷேகத்திற்கு குறித்த நேரமும் வந்துவிடுகிறது.  ராம பட்டாபிஷேகத்தை அயோத்தியாப்பட்டிணத்திலேயே முடித்துக்கொண்டு இருவரும்  புறப்பட்டனர். அயோத்திக்குச் சென்றவுடன் சம்பிரதாயத்துக்கு ஒரு பட்டாபிஷேகம்  நடத்திக்கொள்வதாய் ஒரு முடிவானது. அச்சமயம்  ராவணின் தம்பி விபீடணனும்  ராவணன் அடக்கம் முடித்து விட்டு  அவர்களோடு அயோத்தியாபட்டினத்தில் வந்து சேர்ந்துகொண்டானாம். விட்டல் ராவ் விவரமாய்த்தான் சொல்கிறார்.

 எழுத்துலகில் எழுத்தாளர் சேலம் பகபில பகடாலு நரசிம்மலு நாயுடு’ தட்சிண இந்திய சரித்திரம்’  என்னும்  அரிய பெரிய நூலை எழுதியவர். இது நமக்குப் படிக்க கிடைக்குமா தெரியவில்லை

 நாமக்கல் கவிஞர் வே. ராமலிங்கம் பிள்ளை  என் கதை,மலைக்கள்ளன் நூல்களைத்தந்தவர்.

 எழுத்தாளர்கள் கு. சின்னப்ப பாரதி,தமிழ் நாடன்,சி. மணி, பாக்கியம் ராமசாமி,மகரிஷி, திலகவதி ஐ பி எஸ்,பெருமாள்முருகன் கலைஞர்கள் நாமகிரிப்பேட்டை கிருஷ்ணன், சேலம் ஜெயலட்சுமி என சேலத்துப்பெருமைகளை அடுக்கிக்கொண்டே போகிறார் விட்டல் ராவ்.

விட்டுப்போனவைகள் என்று சில  இருக்கலாம்.   விட்டல் ராவால் சொல்லப்பட்ட விஷயங்கள்  மிக அழகாகச்சொல்லப்பட்டுள்ளன. படிக்கத்துவங்கினால் படித்து  முடித்துவிட்டுத்தான்  மறுவேலை என்கிறபடிக்கு வாசகனைப்பந்தப்படுத்துகிறது விட்டலின்  எழுத்துநடை.

பாவண்ணன் பெங்களூரை எழுதினார் சந்தியா நடராஜன் மயிலாடுதுரையை எழுதினார், சுப்ரபாரதிமணியன் புதுச்சேரியை எழுதினார் விட்டல் ராவ் சேலத்தை எழுதினார். இன்னமும் சில இவ்வகையில் இருக்கலாம். இது ’ஊரும் பேரும்’ காலமோ என்னவோ.

-----------------------------