சாதியும் தேர்தலும்

 

 

 

சாதியும் தேர்தலும்

 

நம்மில் ஒரு பகுதியை

ஊரிலிருந்து  புறந்தள்ளி

ஒதுங்கியே நீ வாழென்று

சபித்துத்துக் கொடுமை

செய்திட்ட சமூகத்தைப்

பாதகம் செய்தனை  நீ  எனச்

சுட்டிய  முதல்முதல்

எழுத்துக்காரன் யார்

சாதி இரண்டொழிய வேறில்லை

என்றாள் அவ்வை

பிறப்பொக்கும் எல்லா உயிர்க்கும்

என்றார் வள்ளுவர்

வேற்றுமை தெரிந்த நாற்பாலுள்ளும்

கீழ்ப்பால் ஒருவன் கற்பின்

மேற்பால் ஒருவனும்

அவன் கட் படுமெனச்

சுட்டியது புறம்

ஒன்றே குலம் ஒருவனே தேவன்

ஓங்கிச்சொன்னார் திருமூலர்

சாதிகுலம் பிறப்பென்னும்

சுழி பட்டுத்தடுமாறும்

ஆதமிலி நாயேன்  தானென்றார்

திருவாசகம் அருளிய மாணிக்கவாசகர்

பிறந்த பல்லுயிரின்

 மனத்தளவு உறையும் இறை

என்றார் உமறுப்புலவர்

எத்துணையும் பேதமுறாது

எவ்வுயிரும் தம் உயிர்போல் எண்ணி

உள்ளே ஒத்து

  உரிமை உடையவராய்

உவக்கின்றார் யாவர்

அவர் உளம் தான்  

இறை நடம் புரியும்  கனகசபை

 வள்ளல் ராமலிங்கர் சொன்னபடி

சாதிகள் இல்லையடி பாப்பா

 பாப்பவுக்கே சொல்லிப்போனார் பாரதி

கேட்பதற்குத்தான் ஆளைக்காணோம்

தமிழனுக்கு ச்சாதி

தொண்டைவரை அடைத்துப்

பாடாய்ப்படுத்துகிறது

தேர்தல் வந்து வந்து

சாதி விஷச்செடிக்கு

நீர் வார்த்து  விட்டுப்போகிறது

தேர்தலும்   தொலைந்தால்

காரிருள் தானே விஞ்சும்..

---------------------------------------------------------------------------

./