செம்பரம்பாக்கம்

 

செம்பரம்பாக்கம்          

 

தாயைப்பழித்தாலும்

தண்ணீரைப்பழிக்காதே

சொல்லியிருக்கிறார்கள் எனக்கும்

செம்பரம்பாக்கம் என்னும் அரக்கன்

சென்னை வாசிகளுக்கு எமனாய்

இந்த ஆண்டிலே இது நான்காவது முறை

நிறைந்து போனதாம் ஏரி

ஆகத்திறந்து விடுகிறார்கள்

என்று திறந்தாலும் துக்கமே எனக்கு

புளி கரைக்கிறது அடி வயிற்றில்

விவரம் தெரியாமல் இடம் வாங்கி

வீடென்று  ஒன்று கட்டினேன்

கையில் வைத்திருந்த காசெல்லாம்

விழுங்கியது அது

அடையாறு அருகே

 மனை சயனித்திருப்பது 

 எங்கே தெரிந்தது

மனை ஒன்று வாங்கி வீடுகட்டி

குடியும் வந்தாயிற்று

கோபூசை லட்சுமி பூசை முடித்துத்தான்

ஆண்டுக்காண்டு அக்டோபர் நவம்பரில்

செம்பரம்பாக்கம்  வாய்த்திறக்க

சட்டியும் புட்டியும்

தூக்கிக்கொண்டு உறவுக்காரர்

வீடென்று போய் அவர்களுக்கும்

என் வருகை கசந்து போனதே

ஆக மழையொடு வெள்ளம் என்றால்

தாம்பரம்  மய்யமாய்

 வாடகை விடுதி

தங்கலும் பழகிப்போயிற்று.

கொரோனாவின்  பெருவருகை

அந்தத்தங்கலுக்கும்

வந்தது பார் ஆபத்து

ஆக என் மனையாளும் நானும்

கட்டிய வீட்டுக்குள்

முட்டிக்கொள்கிறோம்

தெருவெல்லாம்  முழங்கால்த்தொட்டு

அடையாற்று நீர்  நீட்சி

உலகத்துக்குப்பயை ச்சுமந்தபடி

வீட்டுக்குள் வரட்டுமா என்ன

கேட்கிறது அடையாற்று ஆகிருதி

குல தெய்வம் ராயம்பரம் செல்லியம்மனை

வேண்டித் துதிக்கிறேன்

நாத்திகன் நான் பொதுவுடமைக்காரன்

வேறு வழியேதும் தெரியவில்லை எனக்கு.

---------------------------------------------